同一樣食物,對於唔同人嚟講都有唔同嘅意義
今日,等我講下我同蛋撻嘅一個故事

我其實唔係太鐘意食蛋撻
可能係細個食得太多嘅關係啩

我嫲嫲係一個好鍾意食蛋撻嘅人
係佢未離開之前,成日都會叫我落下面茶餐廳幫佢買蛋撻做下午茶
熱辣辣嘅蛋撻新鮮出爐,十蚊有六隻
無輪放學番屋企定專登落街,我同妹妹都會輪流落街買番嚟

當時嘅我,又唔係話特別討厭食蛋撻嘅
因為嫲嫲鍾意食,為咗氹佢開心,所以都會一齊買一齊食
嫲嫲好似食極都唔厭咁,或者可能佢覺得厭但係無出聲啦
當你一連幾個星期都食蛋撻之後,你就會唔想再食
如事者蛋撻由一盒六個好快清晒
到後來一個、兩個、三個放係度到凍晒無人食⋯⋯
唔記得幾時開始因為無咩人食,我都無再特登落街買嚟食啦⋯⋯

 

到而家,有得揀,其實我都唔會特登買蛋撻嚟食,
可能之前食得太多太多已經用盡我一世嘅限額啩
但係只要我見到蛋撻,都會想起嫲嫲
想起佢叫我落街幫佢買蛋撻,想起佢見到蛋撻開心嘅表情⋯⋯

呢個,係屬於我同蛋撻嘅故事。

版權所有©2013 創動力媒體 Dynamix