向豬朋狗友說「不」-某小培

    自從我衰咗之後,警方就將個個案交咗畀「新境界」嗰邊嘅姑娘跟進我。本身開頭,我無乜點\講嘢,自己不嬲都係一個幾靜嘅人,但自從我識到「新境界」嘅人之後,我開始多嘢講咗,個人都開心咗,社工佢哋亦都令我有好大嘅改變。以前嘅我,成日無返學,因為受朋友影響,所以我中二已經退咗學,日日出去蒲,同埋啲背景無咁好嘅人日日去流離浪蕩,仲試過破壞公物、打架、同埋吸毒,搞到要入差館。不過其實我覺得自己已經好好彩,未試過入去坐監,而我班朋友就好多都入咗去坐,所以我已經無再搵佢哋嘞。我嗰時除咗咁之外,仲會成日都唔會返屋企,而且成日同屋企人嗌交。但係自從我衰咗之後,我已經慢慢開始遠離呢班人,因為我知道咁樣落去我將來都唔會好,同佢哋一齊玩係會無前途。其實我都覺得自己改變咗好多,我個人無咁怕羞嘞、樂觀咗、已經無再同班壞人玩。

    我衰完之後,開始諗自己有乜嘢理想,知道自己將來想做邊行,而我依家都開始讀緊啲課程。人生都變咗唔少,我覺得自己幾好彩,因為我覺得人唔跌過,係唔會識得驚。我自己就驚過一次,亦都唔會有第二次發生。雖然我無同嗰班人玩真係少咗好多朋友,但係起碼自己身邊嗰啲唔係豬朋狗友先啦,不過呢,真係要好多謝「新境界」嗰邊啲人同埋社工,因為佢哋真係幫咗我好多好多,同埋佢哋教咗我好多嘢,多謝你哋「新境界」嘅員工。仲要多謝「歧路同途」嘅mentor和一班朋友仔,最緊要嘅梗係要多謝社工姑娘啦,我會好好做好自己,俾心機讀好個課程嚟報答佢哋。

 

社工回應: 寧缺勿濫

人生每個階段都需要朋友,可以是玩伴、用作解悶,但也可高層次至互相分擔/分享苦與樂、互相鼓勵共建理想。而年青人多追求是「無論自己對與錯,對方都撐自己撐到底」的死黨,其實這也是成年人所嚮往的;只是年青人有時為了死黨、為了「埋堆」而妄顧後果;而有時則是因有死黨相伴而放膽任意妄為。

其實,朋友也分不同層次,有點頭之交,也有萍水相逢的朋友;而相處越多,就越有潛移默化的影響;年青人最緊要認清自己方向,勿隨波逐流;能遇上與自己有相近目標的知己朋友是幸運,如未能遇上,就寧缺勿濫。

 

版權所有©2013 創動力媒體 Dynamix