秋天都黎到啦,買衫係轉季既指定動作。

有時行街,見到韓國風或者Vintage風格既帽賣緊一二百蚊一頂,可能你條氣會唔順,又或者見到比較型格少少既外套賣緊三四百蚊,你會覺得好似俾人打劫一樣,想買,但唔捨得。

既然係咁,不如淘寶啦!淘寶係學生恩物,潮人既寶庫,大忙人既天堂,只要有上網、八達通或信用卡就可購買,就算你幾夜收工,24小時運作既淘寶都會為你服務方便得多!

今次,我就主要淘左牛仔外套、加絨貼腳褲同冷帽,仲有其他「雜筆lun」,物價連運費都只係600幾蚊既事,絕對係抵到爛。

今次淘寶,我最期待收到既係牛仔外套,幸好同網上睇既唔係差太遠,只係略為有d皺,同埋比較多線頭,剪左去就冇問題啦!

仲有既係…鈕門要自己剪開,不過以70蚊港紙(已包運費)一件牛仔褸黎講,呢點係絕對可以接受。

第二樣最期待就係冷帽,今次淘返黎既款,好多係市面上搵到,但起碼要百幾蚊一頂,「我接受唔到囉」。亦好好好好好幸運地係淘寶到搵到,有Vintage,有可愛風格,有型女風格,5頂帽加加埋埋連運費都係100蚊既事,20蚊一頂,去邊搵喎!

第三樣,冬天最唔少得既貼腳加絨長褲,我係兩間唔同既淘寶店買,一條30蚊港紙,一條70蚊港紙,由於我見兩者價錢差太遠,姑且買兩條睇下有咩分別。我得出既結論係,貴個條比平多條多左一個牌仔,長度長2-3CM,顏色深少少,同埋真係厚得多。

而我既個人意見,如果你唔係去北京、歐洲、北極的話,買平個條就可以啦!兩者分別真係唔大,但價錢真係平好多,當然,呢樣係見人見智。

最後一樣不得不提,就係平時去晚宴去Party用既Fur,當然今次買返黎既係纖維毛,但絕對唔會比真Fur輸蝕,而且仲環保得多Tim,講緊都係50蚊港紙,唯一美中不足既係絲帶要燙一燙啦!

雖然,好多人都話網上圖片同實物有出入,但只要係淘寶買野時,望清楚其他客人既評價同埋睇下銷量多少就最保險。買野要平、靚、正唔難,除左運氣之外,多花時間睇評價同比較幾間淘寶商店就可以啦!

p.s鳴謝沙律傾力幫忙。Char lalala~

[ 您可能對以下有興趣 ]

網台節目
[沙啦啦罅啦 CharLaLaLaLa] 買衫X-ray 眼
專欄文章
暫時沒有相關資訊
影像節目
暫時沒有相關資訊
此文章之主持/專欄作家介紹:卡Ka乜嘜物
一個愛吃、愛玩、愛追星、愛刺激、愛購物、愛小便宜的「肥妹」,曾經是一名售貨員,賣過靚衫、賣過化妝品、謢膚品,現在是坐在辦公室內的Small Potato。 我只有無雕飾、最真摰的文字,沒有半點假仁假意,帶你看盡天下。 喜‧怒‧哀‧樂,是我的世界,How about you!?

版權所有©2013 創動力媒體 Dynamix