護膚品,平野會有好野。化妝品都係,特別係韓國品牌,好多都係平、靚、正,係唇膏、胭脂、眼影大手入貨既好選擇。

 

但係,化妝最重要係底妝,我試過買平價粉底液,好似Maybelline、DHC、Cyber Color等等,對我黎講質感太厚,好焗好唔舒服,遮暇度比較差。

 

先講明,我膚質係混合性偏乾,敏感性肌膚,臉有雀斑,膚色偏白。我粉底液係用韓國Etude House,碎粉係用Bobbi Brown。Etude House粉底液,對我黎講算唔錯,帶有珠光,雖然偏白,但由於有珠光效果,塊面望上去唔會一片死白,而且有Light up 之效,感覺塊面好水潤。

 

不過,今次重點係講Bobbi Brown碎粉。呢盒碎粉,出面賣緊$400,對我黎講係超貴,如果唔係朋友有discount我都唔捨得買。

 

化底妝,粉底液重要,碎粉更重要!粉底液主要遮暇、調膚色,碎粉係定妝、加強遮暇、控油。Bobbi Brown碎粉,第一次試上手已經喜愛到不行,粉質細滑。

即使我手比較乾,碎粉一掃上去,乾紋都遮到,摸摸手背依然滑手。我試過烈日當空下,大汗疊細汗,用紙巾輕輕印走汗水,妝容都冇半點溶妝跡象,鼻翼兩端亦沒有出油。就算大笑一頓,法令紋位置都唔會有卡粉情況出現。

 

由於我有嚴重黑眼圈,用上遮暇膏都唔能夠完全遮蓋,所以我會用指腹沾上碎粉,再輕壓眼圈位置,由於手指暖暖的關係,可以令碎粉更貼服。

 

完成底妝之後,亦可以磨擦雙掌輕撫臉頰,可以大大減少甩粉、溶妝既問題。

 

底妝是整個彩妝最重要一環,即使你雙眼、你咀唇化得多美、有多懾人心弦,只要面油一出,所有美麗都會毀於一旦,選擇碎粉絕對不能馬虎。

Credit

圖片由作者提供

此文章之主持/專欄作家介紹:卡Ka乜嘜物
一個愛吃、愛玩、愛追星、愛刺激、愛購物、愛小便宜的「肥妹」,曾經是一名售貨員,賣過靚衫、賣過化妝品、謢膚品,現在是坐在辦公室內的Small Potato。 我只有無雕飾、最真摰的文字,沒有半點假仁假意,帶你看盡天下。 喜‧怒‧哀‧樂,是我的世界,How about you!?

版權所有©2013 創動力媒體 Dynamix