圖片係上年冬天影嘅,要多謝同事嘅心思。

事發係某一個平凡嘅上午,係銅鑼灣地鐵站見到呢位女士,當時見到佢行一步、停一步,於是就上前問:「小姐請問妳去邊啊?我會幫到妳嗎?」「好啊,我要趕返工,咁麻煩你啦!」女士笑住答。原來佢喺附近做盲人按摩,睇唔到路,人又多,返工好易遲到。

大家沿途有講有笑,仲記得佢話最鍾意「睇」郭富城演場會,講嘅時候,手舞足蹈,我都跟住笑咗。由地鐵到盲人按摩店,短短10分鐘嘅路程,充滿住簡單嘅快樂。

朋友成日問,創業咁辛苦,走冇人走嘅路,點樣保持正面嘅心態面對呢?其實冇秘密,以下「助人為快樂之本」嘅事情,你做到,都好難會唔快樂:

- 主動觀察,見到需要幫嘅人,而自己又幫到嘅,就去幫!可以係扶盲人過馬路、讓坐俾人、幫人攞車仔上樓梯、㩒住部電梯...全都係日常生活會經常遇到嘅事,原來快樂就係身邊!

- 多稱讚別人,等對方知道自己嘅優點,唔好擺响心度!讚人又唔駛錢,點解要咁孤寒?家人、同事、男女朋友、同學、老公老婆...時時刻刻都有讚人嘅機會,原來快樂係由你自己開始!

想快樂,唔係等人地俾你架,而係你自己可以創造!助人為快樂之本,好老土咩?真係明白同做到嘅,又有幾多人呢?

此文章之主持/專欄作家介紹:Danny Chan
《讚筆絕口》-陳偉業(Danny)於澳洲修畢旅遊管理及市務學學位,回港後曾於旅遊、品牌管理、人才培訓及公共事務服務。有感社會欠缺讚賞文化,Danny於2010年創立全球首個網上讚賞平台 ﹣我讚!(www.praisage.com) ,並為機構提供專業讚賞管理服務。70後棄高薪創業,相信:成長自己為「創」,貢獻社會為「業」。

版權所有©2013 創動力媒體 Dynamix